Námskeið kennt í gegnum fjarfundabúnað frá Endurmenntun Háskóla Íslands (EHÍ).

Er talað um einhverjar aðrar konur í Biblíunni en Evu og Maríu Guðsmóður? Er Biblían ekki fyrst og fremst karlasaga? Eru konurnar að minnsta kosti ekki allar í aukahlutverkum? Og hvað með nútímann? Skipta sögur þessara kvenna einhverju máli í dag?

Á námskeiðinu verður lögð áhersla á sögur um konur sem varðveittar eru í Gamla og Nýja testamentinu. Konurnar hafa margvíslegan bakgrunn og varpa sögur þeirra ljósi á stöðu kvenna innan gyðing-kristins samfélags á liðnum öldum. Þrátt fyrir völd karla og þann karlmiðlæga hugsanahátt sem var ríkjandi í þessum samfélögum, þá er ýmislegt sem kemur á óvart þegar farið er að skoða betur sögur þeirra kvenna, sem af ýmsum ástæðum er getið um í ritum Biblíunnar. Með aukinni áherslu á virka þátttöku kvenna í lífi og starfi kristinnar kirkju, hefur áhugi á þessum sögum aukist. Því verður ekki aðeins hugað að hefðbundinni túlkun þessara sagna, heldur einnig þeim áhrifum sem þær hafa haft á líf kvenna í sögu og samtíð.