Námskeið í gegnum fjarfundabúnað frá Endurmenntun Háskóla Íslands.

Guðrún frá Lundi var 59 ára þegar hún gaf út sína fyrstu bók árið 1946, hún skrifaði síðan 27 bindi af skáldsögum, nærri 10.000 síður og þá síðustu þegar hún var 86 ára gömul. Hún var metsöluhöfundur í áratugi en ekki voru allir jafnhrifnir af vinsældunum og var hún nefnd drottning kerlingabókanna. Sjálf gerði Guðrún góðlátlegt grín að öllum látunum en hitti naglann á höfuðið þegar hún sagði í einu blaðaviðtali, “Kerling eins og ég má ekki skrifa svona mikið”.

Á námskeiðinu verður farið yfir ævi og störf Guðrúnar og þann heim sem verk hennar er sprottin upp úr. Rætt verður sérstaklega um Dalalíf sem kom út á árunum 1946-1951 en einnig um önnur verk s.s. Afdalabarn og Tengdadótturina.

Umræðan um verk Guðrúnar hefur breyst mikið á síðustu 15 árum og á námskeiðinu verður rýnt í þann ótta sem vinsældir verka hennar vöktu og hvaða áhrif sá ótti hafði. 

Höfundarnafn Guðrúnar frá Lundi er gríðarlega sterkt í vitund þjóðarinnar og má segja að heilli kynslóð hafi verið kennt að líta niður á verk hennar á sama tíma og hún var mest lesni höfundurinn. Vinsældir Guðrúnar voru svo miklar að handritin voru sótt áður en skáldkonunni tókst að ljúka við þau og greinilegt er að forleggjarinn sem lagði í útgáfuna á fyrsta bindi Dalalífs árið 1946 byggði sitt fyrirtæki nær einvörðungu á bókum Guðrúnar.  En hvers vegna var umræðan svona óvægin, hvað var að óttast?

Marín Guðrún Hrafnsdóttir, bókmenntafræðingur og langömmubarn Guðrúnar hefur umsjón með námskeiðinu. Gestafyrirlesarar eru Guðrún Jónsdóttir B.A. í íslensku frá H.Í og Helga Birgisdóttir, doktorsnemi í íslenskum bókmenntum.