Við bjóðum Sigríði hjartanlega velkomna til starfa!

Fræðslumiðstöð Vestfjarða býður fullorðnu fólki upp á fría náms- og starfsráðgjöf á grundvelli laga um framhaldsfræðslu nr. 27/2010. Hægt er að bóka viðtal við ráðgjafa með því að senda tölvupóst á sigridur@frmst.is eða frmst@frmst.is

Í Murcia heimsótti hópurinn CEA García Alix, skóla fyrir fullorðinsfræðslu, þar sem þátttakendur kynntu sér starfsemi skólans og tóku þátt í kennslustundum. Þátttakendur sóttu meðal annars tíma í ensku, spænsku og tölvum, þar sem fjallað var um upplýsingatækni og notkun gervigreindar í námi og daglegu lífi. Heimsóknin gaf þátttakendum tækifæri til að afla sér nýrrar þekkingar, skiptast á hugmyndum og kynnast nýrri menningu.

Það var sérlega ánægjulegt að þátttakendur komu víða að af Vestfjörðum, meðal annars frá Ísafirði, Hnífsdal, Suðureyri, Patreksfirði, Bíldudal og Hólmavík. Ferðin skapaði gott tækifæri fyrir fólk af ólíkum svæðum til að kynnast betur, læra saman og deila reynslu.

Ferðin var bæði lærdómsrík og eftirminnileg og var styrkt af Erasmus+.

Fræðslumiðstöð Vestfjarða þakkar öllum þátttakendum fyrir þátttöku í virkilega vel heppnaðri ferð og ánægjulega samveru. 

Hjá Fræðslumiðstöð Vestfjarða stendur þátttakendum til boða að fara í raunfærnimat, sem getur stytt leiðina í gegnum námið verulega.

Raunfærnimat felur í sér að metin er sú þekking og færni sem einstaklingar hafa aflað sér utan hefðbundins skólanáms. Þar getur verið um að ræða starfsreynslu, starfsnám, frístundanám, félagsstörf eða reynslu úr daglegu lífi. Þessi færni er metin til eininga á framhaldsskólastigi eða samkvæmt viðmiðum atvinnulífsins, sem getur bæði sparað tíma og aukið hvatningu til að ljúka námi.

Mat á raunfærni er ætlað einstaklingum sem eru 23 ára eða eldri og hafa að minnsta kosti þriggja ára reynslu í viðkomandi grein. Fræðslusjóður greiðir þátttökugjald fyrir þau sem ekki hafa lokið formlegri menntun. Sumir starfsmenntasjóðir styrkja þátttöku í raunfærnimati fyrir þau sem hafa útskrifast úr öðru námi.

Ráðgjafar Fræðslumiðstöðvar Vestfjarða veita allar nánari upplýsingar um raunfærnimat - ekki hika við að hafa samband í síma 456 5025 eða með tölvupósti á frmst@frmst.is">frmst@frmst.is

Nánari upplýsingar um námið sjálft er að finna á vef Menntaskólans á Ísafirði misa.is

Í heimsókninni fengum við tækifæri til að kynnast því hvernig kennarar á Kanaríeyjum takast á við landfræðilegar áskoranir og hvaða stafrænu verkfæri þeir nýta í kennslu sinni.

Við fengum fróðlega kynningu á spænska menntakerfinu með sérstakri áherslu á fullorðinsfræðslu. Við fengum einnig tækifæri til að taka þátt í vettvangsnámi (job shadowing) í tungumálatímum og fengum innsýn í kennsluaðferðir, búnað og þau verkfæri sem notuð eru. Einnig var okkur kynnt rafrænt námsumhverfi skólans.

Auk faglegs ávinnings fengum við dýpri innsýn í menningu, fjölbreytileika og sögu Kanaríeyja.

Við erum þakklát fyrir þetta tækifæri og færum CEAD okkar bestu þakkir fyrir hlýjar móttökur.

Viltu sækja um að taka þátt í Erasmus+ verkefni í Murcia á Spáni!

Verkefnið fjallar um virka borgaravitund og samfélagslega þátttöku. Þátttakendur munu sækja tungumála- og tölvunámskeið í fullorðinsfræðslumiðstöð í Murcia og fá tækifæri til að læra nýja hluti og kynnast nýju umhverfi.

Staðsetning: CEA Garcia Alix, Murcia, Spánn
Tímabil: 12.–16. maí (með ferðadögum)

Þátttaka og ferðakostnaður er greiddur með styrkjum frá Evrópusambandinu.

Hafðu samband við okkur á ilona@frmst.is fyrir 15. mars ef þú hefur áhuga.

Á námskeiðinu var farið yfir grunnstillingar síma, aðgengismál og nytsamlegar flýtileiðir. Þátttakendur kynntust gagnlegum öppum, samskiptalausnum og því hvernig senda má og taka á móti myndum. Sérstök áhersla var lögð á netöryggi, svikavarnir og örugga netnotkun. Að auki var boðið upp á kynningu á ChatGPT og gervigreind, með áherslu á einfalda og hagnýta notkun slíkra verkfæra.

Kennari á námskeiðinu var Birna Hannesdóttir. Námskeiðið var haldið í góðu samstarfi við Félag eldri borgara í Vesturbyggð sem tók þátt í kostnaði. Námskeiðið var mjög vel sótt og var það samdóma álit þátttakenda að vel hefði tekist til og mikilvægt að bjóða upp á svona fræðslu fyrir eldra fólk.

Sambærilegt námskeið verður haldið á Ísafirði í febrúar þar sem leiðbeinandi er Ármann Haraldsson. nánari upplýsingar um það má finna hér.

Ferðin var hluti af samstarfsverkefni við CPIA La Spezia, fullorðinsfræðslustofnun sem leggur áherslu á tungumálanám, inngildingu og jöfn tækifæri til menntunar fyrir fólk með fjölbreyttan bakgrunn. Einnig var farið í heimsókn í Cappellini kvöldskólann þar sem fullorðið fólk sem ekki hefur lokið framhaldsskóla fær tækifæri til að ljúka grunnnámi. Jafnframt bíður skólinn upp á starfsnám í rafeindavirkjun, vélfræði og siglingafræðum.

Í ferðinni fengum við góða kynningu á fyrirkomulagi fullorðinsfræðslu á Ítalíu, m.a. skipulagi, stjórnsýslu og framkvæmd náms. Í báðum skólum hittum við stjórnendur og kennara sem deildu reynslu af verkefnum sem miða að auknu aðgengi og stuðningi auk þess að ræða áskoranir í fullorðinsfræðslu. Þá fengum við líka tækifæri til þess að hitta nemendur og fá þeirra sýn á námið.

Megináhersla var lögð á tungumálakennslu. Okkur bauðst að taka þátt í kennslustund í ítölsku sem öðru máli og líka í ensku fyrir innfædda. Það var sérstaklega gaman að fá að hitta nemendur og spjalla við þá um reynsluna af náminu. Þarna var fólk með alls konar bakgrunn og á öllum aldri, sá elsti á enskunámskeiðinu var 87 ára. Það er aldrei of seint að læra!

Með í ferðinni var enskukennari frá háskólanum í Cork á Írlandi og sköpuðust þar ný og góð tengsl sem gætu orðið grunnur að áframhaldandi samskiptum og sameiginlegum verkefnum.

Auk þess að kynnast fullorðinsfræðslunni fengum við að njóta menningar og fegurðar þessa einstaka svæðis með heimsóknum til Portovenere, Lerici og Cinque Terre. Ferðin veitti dýrmætan innblástur fyrir áframhaldandi starf Fræðslumiðstöðvar Vestfjarða, sérstaklega varðandi inngildingu og þróun tungumálanáms fyrir fullorðna nemendur.

Í boði eru fjölbreytt námskeið sem nýtast bæði í starfi og daglegu lífi. Má þar til dæmis nefna námskeið um fjármál, hagsýni í heimilshaldi, gervigreind, uppeldi og skyndihjálp. Námskeiðin eru ýmist fjarkennd eða staðkennd.

Nánari upplýsingar um námskeiðin sem í boði eru má finna undir flipanum Nám – Stéttarfélög. Skráning fer fram hér á síðunni, en einnig er hægt að hafa samband við Fræðslumiðstöðina í síma 456 5025 eða með tölvupósti frmst@frmst.is. Við skráningu er mikilvægt að taka fram hvaða stéttarfélagi fólk tilheyrir.

Fræðslumiðstöðin hvetur félagsfólk eindregið til að nýta sér þetta góða boð stéttarfélaganna – frábært tækifæri til að efla færni, auka sjálfstraust og styrkja sig í starfi.

Að sjálfsögðu eru öll námskeiðin opin öðrum. Fræðslumiðstöðin hvetur því alla til að kynna sér möguleika á endurgreiðslu þátttökugjalda hjá sínu stéttarfélagi.

Í tengslum við verkefnið fékk miðstöðin nýlega heimsókn frá samstarfsskóla í Plasencia á Spáni. Þar var rætt um mikilvægi inngildingar og fjölbreytileika í skólastarfi og skipst á hugmyndum og reynslu.

Við hlökkum til framhaldsins – til nýrra ævintýra, vináttu og tækifæra til að læra saman.

Við hjá Fræðslumiðstöð Vestfjarða viljum bjóða upp á fjölbreytt og hagnýt námskeið sem endurspegla þarfir og áhuga fólks á vinnumarkaði, í samfélaginu og í daglegu lífi.

Nokkrar lengri námsleiðir eru í farvatninu og komnar á heimasíðuna okkar, skipstjórnarnámið verður á sínum stað í vetur sem og íslenskunámskeiðin.

Nú leitum við eftir hugmyndum og ábendingum frá fólki á svæðinu um önnur námskeið – hvaða námskeið myndir þú vilja sjá í boði í haust og vetur? Við tökum vel á móti öllum tillögum.

Ef þú hefur hugmynd að námskeiði endilega sendu okkur póst á frmst@frmst.is