Í samstarfi við Konfúsíusarstofnunina Norðurljós.

Á námskeiðinu verður þátttakendum veitt innsýn í menningu og sögu Kína ásamt fróðleik um ýmsa áhugaverða staði og helstu borgir Kína s.s. Beijing, Shanghai og Xian.

Hið ótrúlega mannvirki, Kínamúrinn, verður að sjálfsögðu til umfjöllunar og hallir þriggja síðustu keisaraætta Kína innan hinnar svokölluðu Forboðnu borgar verða skoðaðar. Torg hins himneska friðar kemur við sögu ásamt Leirhernum fræga í Xian sem átti að verða einkaher fyrsta keisara Kína í framhaldslífi hans. Margir fleiri áhugaverðir staðir munu bera á góma enda margt að skoða í Kína. Á námskeiðinu verður jafnframt fjallað um einkenni 5.000 ára sögu Kína og helstu þætti í menningunni skoðaðir ásamt tungumáli. Af elstu menningarþjóðum heims er Kína sú eina þar sem menningarsagan er órofin frá árdögunum við bakka Gulár til dagsins í dag. Það gerir hana einstaka. Að lokum verður aðeins tyllt niður fæti í nútímanum og kínverskt samfélag, sem nú er að taka miklum breytingum, verður skoðað út frá ýmsum hliðum.