Listaskóli Rögnvaldar Ólafssonar og Fræðslumiðstöð Vestfjarða gangast fyrir röð stuttra alþýðlegra námskeiða um tónlist veturinn 2011-2012. Námskeiðin verða haldin á fimmtudagskvöldum í Edinborgarhúsinu kl. 20:00 - 22:00.

Námskeiðin verða óháð hvert öðru og koma að tónlistinni frá ýmsum hliðum. Farið verður í mismunandi tónlistarstefnur, tengsl þeirra og uppruna, hvernig tónlist er samin, kynningu á hljóðfærum, sögu þeirra og þróun og hvernig hljóðfærin eru notuð til að túlka náttúruna og tilfinningar. Námskeiðin verða öllum opin, en þó einkum miðuð við fólk sem hefur áhuga á tónlist en ekki hlotið mikla tónlistarlega menntun.

Að þessu sinni munu Helga Kristbjörg Guðmundsdóttir, Jón Þorsteinn Reynisson og Ásgeir S. Sigurðsson kynna fólk hinn heillandi heim harmonikunnar. Rakin verður saga harmonikunar og uppruni, fjallað um hvernig hún er samansett og hvernig hún virkar. Fjallað verður um hlutverk harmonikunar fyrr og nú og hvernig tónlist var leikin á hana á mismunandi tímum. Inn á milli verða leikin ýmis tóndæmi.