Eins og undanfarin ár er Fræðslumiðstöð Vestfjarða í samstarfi við nokkur stéttarfélög um greiðslu námskeiðsgjalda. Félagsfólk þessara félaga getur því sótt ákveðin námskeið hjá Fræðslumiðstöðinni sér að kostnaðarlausu.
Samstarfið nær til Verk Vest, Verkalýðs- og sjómannafélags Bolungarvíkur, Sameykis og Kjalar stéttarfélags, auk stéttarfélaga sem eiga aðild að Iðunni.
Námskeiðin eru fjölbreytt og af ýmsum toga. Mörg þeirra eru fjarkennd en einnig er boðið upp á staðnámskeið á Ísafirði. Nánari upplýsingar um þau námskeið sem falla undir þetta fyrirkomulag má finna undir flokknum Stéttarfélög hér á síðu Fræðslumiðstöðvarinnar.
Fræðslumiðstöðin hvetur fólk til að nýta sér þetta góða tækifæri og kynna sér úrval áhugaverðra námskeiða sem eru í boði í haust.
Námskeiðin eru öllum opin og er fólk í öðrum félögum en þeim sem hér eru nefnd hvatt til að kanna hjá sínu stéttarfélagi eða starfsmenntasjóði hvort það eigi rétt á styrk eða endurgreiðslu vegna námskeiðsgjalds.
Mikilvægt er að taka fram við skráningu í hvaða stéttarfélagi þátttakandi er.
- miðvikudagurinn 23. september 2026
- Dagný Sveinbjörnsdóttir
Í júní á þessu ári hélt starfsfólk Fræðslumiðstöðvar Vestfjarða til Þýskalands þar sem Volkshochschule í Chemnitz var heimsóttur. Við dvöldum þar í nokkra daga í starfsspeglun þar sem við fengum tækifæri til að kynnast starfsemi og uppbyggingu skólans, deila reynslu og sækja okkur nýjar hugmyndir sem geta nýst í starfi okkar hjá Fræðslumiðstöðinni.
Við tókum þátt í ýmsum námskeiðum og kynntum okkur fjölbreytt námsframboð Volkshochschule. Þar eru meðal annars tungumálanámskeið, matreiðslunámskeið og íþrótta- og hreyfitímar. Það var áhugavert að sjá hversu fjölbreytt fræðslustarf getur verið innan fullorðinsfræðslunnar.
Eitt af því sem vakti sérstaka athygli okkar var samstarf skólans við söfn og aðrar stofnanir í samfélaginu. Einnig var áhugavert að kynna sér þær leiðir sem skólinn fer til að stuðla að inngildingu nýrra íbúa og efla menningarmiðlun. Þessi nálgun gaf okkur nýja sýn á hvernig hægt er að tengja saman nám, menningu og samfélag.
Á meðan á dvölinni stóð fengum við einnig tækifæri til að kynnast sögu og menningu Chemnitz og Austur-Þýskalands. Við fræddumst meðal annars um sögu svæðisins frá þeim tíma þegar það tilheyrði fyrrum Austur-Þýskalandi.
Heimsóknin var bæði fræðandi og hugvekjandi. Við fengum tækifæri til að deila hugmyndum og reynslu og kynnast nýjum leiðum í fullorðinsfræðslu. Ferðin var því dýrmæt bæði frá faglegu og menningarlegu sjónarhorni og við komum heim þakklátar og með margar nýjar hugmyndir.
Ferðin var styrkt af Erasmus+.
- miðvikudagurinn 23. september 2026
- Ilona Dobosz
