Forsíða
Fræðslumiðstöð Vestfjarða
frmst@frmst.is
456-5025

Er Grunnmenntaskólinn eitthvað fyrir þig?

Þátttakendur í Grunnmenntaskóla fyrir nokkrum árum.
Þátttakendur í Grunnmenntaskóla fyrir nokkrum árum.

Hjá Fræðslumiðstöðinni er nú verið að kanna hvort grundvöllur sé að fara af stað með nám í Grunnmenntaskóla á Ísafirði og á Hólmavík. Grunnmenntaskólinn er 300 kennslustunda nám sem kennt er eftir námsskrá frá Fræðslumiðstöð atvinnulífsins. Námið er hugsað fyrir fólk sem hefur litla formlega menntun, eða hefur ekki verið lengi í námi en langar að komast af stað aftur.

Meðal námsþátta eru íslenska, enska, stærðfræði, námstækni og tölvu- og upplýsingatækni. Lögð er áhersla á verkefnavinnu, verklegar æfingar, hópavinnu, umræður og rökræður í stað hefðbundinna prófa.  Í náminu er lögð áhersla á að námsmenn læri að læra, efli sjálfstraust sitt og lífsleikni. Reynslan af Grunnmenntaskólanum er sú að margir koma þar inn með lítið sjálfstraust og vantrú á eigin námsgetu en útskrifast svo með þá fullvissu að auðvitað geti þeir lært og halda margir áfram á þeirri braut.

Náminu er skipt á nokkrar annir (3-4) og kennt er utan hefðbundins vinnutíma, gjarnan tvo seinniparta í viku, en skipulag tekur mið af óskum þátttakenda eins og mögulegt er.

Fræðslumiðstöðin hefur nokkrum sinnum kennt Grunnmenntaskóla; á Ísafirði, Þingeyri, Hólmavík og Patreksfirði, en nokkur ár eru síðan námið var síðast í boði.  

Fimmtudaginn 26. febrúar kl. 18 verður kynning á Grunnmenntaskólanum í húsakynnum Fræðslumiðstöðvarinnar að Suðurgötu 12 á Ísafirði. Allir áhugasamir eru hvattir til að mæta og sjá hvort þetta er eitthvað sem hentar.

Þess má geta að mennta- og menningarmálaráðuneytið veitir heimild til  þess að meta nám í Grunnmenntaskólanum til eininga í framhaldsskólakerfinu en það er undir hverjum framhaldsskóla komið hvort og hvernig það er gert.