« 1 af 2 »

Í maí stóð Fræðslumiðstöð Vestfjarða fyrir Erasmus+ kynnis- og námsferð til borgarinnar Murcia á Spáni. Í ferðina fóru níu þátttakendur, 60 ára og eldri, ásamt tveimur starfsmönnum Fræðslumiðstöðvarinnar. Markmið ferðarinnar var að kynna sér hvernig efla má símenntun eldra fólks, með áherslu á tungumál, tæknifærni og félagslega virkni. Ferðin veitti jafnframt dýrmæta reynslu af alþjóðlegu samstarfi og menningarskiptum.

Í Murcia heimsótti hópurinn CEA García Alix, skóla fyrir fullorðinsfræðslu, þar sem þátttakendur kynntu sér starfsemi skólans og tóku þátt í kennslustundum. Þátttakendur sóttu meðal annars tíma í ensku, spænsku og tölvum, þar sem fjallað var um upplýsingatækni og notkun gervigreindar í námi og daglegu lífi. Heimsóknin gaf þátttakendum tækifæri til að afla sér nýrrar þekkingar, skiptast á hugmyndum og kynnast nýrri menningu.

Það var sérlega ánægjulegt að þátttakendur komu víða að af Vestfjörðum, meðal annars frá Ísafirði, Hnífsdal, Suðureyri, Patreksfirði, Bíldudal og Hólmavík. Ferðin skapaði gott tækifæri fyrir fólk af ólíkum svæðum til að kynnast betur, læra saman og deila reynslu.

Ferðin var bæði lærdómsrík og eftirminnileg og var styrkt af Erasmus+.

Fræðslumiðstöð Vestfjarða þakkar öllum þátttakendum fyrir þátttöku í virkilega vel heppnaðri ferð og ánægjulega samveru.