7. maí 2012
Föstudaginn 4. maí voru útskrifaðir nemendur í þremur námsleiðum hjá Fræðslumiðstöð Vestfjarða. Voru þetta 22 nemendur sem luku námi í skrifstofuskóla (240 kennslustundir), 14 nemendur sem luku smáskipanámi (113 kennslustundir) og 7 nemendur sem luku fyrsta hluta í fagnámi fyrir starfsfólk í félags og heilbrigðisþjónustu (60 kennslustundir).

Í tilefni útskriftarinnar var grillaður fiskur og sá Júlíus Ólafsson um það með hjálp Nikólínu Beck Þorvaldsdóttur, enda eru þau æviráðin í verkefnið.

Vetrarstarfið hjá Fræðslumiðstöðinni er nú að fjara út. Eftir eru nokkur stök námskeið og málþing um hafið sem Fræðslumiðstöðin er samstarfsaðili að og verður haldið laugardaginn 19. maí. Fræðslumiðstöðin er þó tilbúin að bregðast við ef óskir koma um nám. Undanfarin vor hafa slíkar óskir komið í maí og starfsemin því staðið langt fram í júní.

Starfsemin hefur verið svipuð á vorönn 2012 og hún var á vorönn 2011. Í vor hafa verið haldin um 60 námskeið og þar eru 7 vottaðar námsleiðir í 14 hópum. Af þeim voru 7 hópar á Grunnnámskeiði fyrir fiskvinnslufólk.